Засгийн газрын тэргүүн тус суманд олон улсын байгууллагын шинжээчдийн хэсгийг яаралтай урин ажиллуулж, дүгнэлт гаргуулах нь зүйтэй гэсэн байр суурьтай байгаагаа илэрхийлэв.
Шинжээчдийн дүгнэлтийг үндэслэн Хонгорт хордлогын нөхцөл байгаа эсэх эцсийн дүгнэлтийг гаргаж, Хонгорынхон нүүх үү, эсвэл эндээ байх уу гэдгийг хамтран тогтооно гэсэн түүний шийдвэрийг Хонгорын иргэд дэмжсэн.
Түүнчлэн эрх ашиг нь ямар нэг хэмжээгээр хохирсон тус сумын иргэдэд нөхөн төлбөр олгохыг судлан, шийдвэр гаргахаа амласан юм. Тэрбээр “Уршигтай асуудлыг урьдчилж харах мэлмий дутсандаа, аюул учирсны дараа аврал, түшиг эрсэн хэрэгтэй тэр цагт нь үүргээ бүрэн гүйцэд биелүүлээгүйдээ Монголын төр Хонгор сумын иргэдээс уучлал гуйж байна” гэж хэлэв.
Ерөнхий сайд С.Баяр Дархан-Уул аймгийн иргэдтэй хийсэн уулзалтын үеэр эх орны эрүүл хөрсөнд ургасан экологийн цэвэр үр тариа, төмс, хүнсний ногоогоор хүн амынхаа хэрэгцээг бүрэн хангахад чиглэсэн “Тариалангийн гурав дахь аян”-ыг хэрэгжүүлэх нь зүйтэй гэж Засгийн газар үзэж байгааг зарлалаа. Тэрбээр энэ арга хэмжээг энэ оноос эхлэн ойрын 2-5 жилийн дотор хэрэгжүүлж, 480 мянган га атаржсан талбайд боловсруулалт хийж, 800 мянган га эргэлтийн талбайтай болсноор жилд 400-420 мянган га-д тариалалт хийн, 350-420 мянган тонн ургац хураан авах боломжийг бий болгоход Засгийн газрын бодлого чиглэж байна хэмээн тодорхойлов. Энэ аянг хэрэгжүүлэхэд шаардлагатай техник, технологи, үр, шатахуун, хөдөлмөрийн нөөц зэрэг хүчин зүйлүүдийг нарийвчлан тооцсон техник, эдийн засгийн үндэслэл буюу “Монгол тариа” төслийг боловсруулах ажлыг эхлүүлээд байгаагаа энэ үеэр мэдэгдлээ гэж Засгийн газрын хэвлэл, мэдээллийн албанаас мэдээлэв.
No comments:
Post a Comment